في الفترة الأخيرة حسينا بنعمة كنا متغافلين عنها وهي نعمة الانشغال نعمة إن يكون وراك حاجة لازم تخلص يكون وراك شغل لازم تعمله يكون عندك مهمة بتقضي فيها وقتك وبتنشغل بالتخطيط ليها وإخراجها على أفضل هيئة
فكرة إن وراك شغل أو دراسة أو أي حاجة شغلاك وبتاخد من وقتك وتحسسك بالإنجاز لما تخلصها دي نعمة كبيرة كتير مش واخد باله منها
على العكس منها
توهم الفراغ وهو إنك تتخيل إنك فاضي فهتعمل كل حاجة وبعدين تأجل وتسوف وتعتمد على الفراغ ده ومتعملش حاجة.. وقتك كله بتقضيه في اللاشيء.. مواركش أي حاجة.. حتى النوم زهقت منه.. وحتى الاسترخاء بقى متعب ليك.. ودي أكبر نقمة ممكن تحس بيها
الأمر أشبه بطريق مليان صعوبات لكن في آخره شيء ملموس توصل ليه وطريق آخر عبارة عن دايرة بتلف فيها بدون أي صعوبة وبترجعك لنفس النقطة اللي كنت فيها بلا أي محصلة حقيقية أو شغف أو هدف حقيقي ودي أسوأ دايرة ممكن يمر بيها الإنسان
فلو معندكش نعمة الانشغال اخلقها.. اعمل تحدي مع نفسك.. مارس رياضة اتعلم حاجة جديدة.. اقرأ حاجة.. المهم متدخلش الدايرة ومتكررش يومك بدون أي جديد فيه.. ربنا يرزقنا نعمة الانشغال ويبعد عننا توهم الفراغ
